ဖွင့်လှစ်ခဲ့မှုသမိုင်း

မြန်မာ့ကျောက်မျက်ရတနာပြတိုက်(ရန်ကုန်)

 

၁။      မြန်မာ့ကျောက်မျက်ရတနာပြတိုက်(ရန်ကုန်)သည် ပြည်ထောင်စုသမ္မတမြန်မာနိုင်ငံတော်၏ စီးပွားရေးမြို့တော် ဖြစ်သော ရန်ကုန်တိုင်းဒေသကြီး၊ မရမ်းကုန်းမြို့နယ်၊ ကမ္ဘာအေးဘုရားလမ်းပေါ်တွင်တည်ရှိ၍ မြေဧရိယာအကျယ် အနေဖြင့် အရှေ့ဘက်တွင်(၂၉၂)ပေ၊ တောင်ဘက်တွင်(၃၇၃)ပေ၊ အနောက်ဘက်တွင် (၂၈၉)ပေနှင့် မြောက်ဘက်တွင် (၅၀၉)ပေ ရှိပါသည်။ပြတိုက်အဆောက်အဦ ဧရိယာမှာ (၄၃၅၀၀)စတုရန်းပေရှိပါသည်။ မြန်မာ့ကျောက်မျက်ရတနာ ပြတိုက်(ရန်ကုန်)ကို (၁၁.၁၁.၁၉၉၃)ရက်နေ့တွင် စတင်ဆောက်လုပ်ခဲ့ပြီး(၂၄.၆.၁၉၉၅)ရက်နေ့တွင် ဖွင့်လှစ်ခဲ့ပါသည်။

၂။       မြန်မာ့ကျောက်မျက်ရတနာပြတိုက်(ရန်ကုန်)တွင် အထပ်ပေါင်း(၄)ထပ်ရှိရာ အပေါ်ဆုံးထပ်သည် ပြတိုက် ခန်းမဆောင်ဖြစ်ပြီး ကျန်အထပ်(၃)ထပ်သည် ရတနာဈေးဖြစ်ပါသည်။ ပြခန်းဆောင်အတွင်း ခင်းကျင်းပြသထားရှိမှု ပုံစံမှာ ကျောက်မျက်ပြကွက်၊ ကျောက်စိမ်းပြကွက်၊ လက်ဝတ်ပြကွက်၊ ပုလဲပြကွက်နှင့် တွင်းထွက်သယံဇာတပြကွက် ဟူ၍ ပြကွက်(၅)မျိုးပြသထားပြီး မင်းတုန်းမင်းလက်ထက်၊ မိုးကုတ်ရတနာနယ်မြေတွင် ရတနာတူးဖော်ရေးညှိနှိုင်း ဆွေးနွေးရန် ပြင်သစ်ကိုယ်စားလှယ်အား ယောအတွင်းဝန် ဦးဖိုးလှိုင်က နန်းစဉ်ပတ္တမြားငမောက်ကို  တန်ဖိုးဖြတ်စေ ခဲ့သည့်ပန်းချီကားကို တင့်တယ်လှပစွာရေးဆွဲ  ပြသထားရှိပါသည်။

၃။      ပြတိုက်အဆောက်အဦ၏  ပထမထပ်၊ ဒုတိယထပ်နှင့် တတိယထပ်တို့တွင်  ပြတိုက်သို့လေ့လာကြည့်ရှုရင်း ကျောက်မျက်ရတနာများနှင့် အမှတ်တရပစ္စည်းများ ဝယ်ယူနိုင်ရန်အတွက် နိုင်ငံသားများပိုင်ရတနာဆိုင်များကို ဖွင့်လှစ်ထားရှိပါသည်။ ရတနာဆိုင်များတွင် ဆေးဆိုး/တုပ ပစ္စည်းများ ရောင်းချခြင်းမပြုစေဘဲ စစ်မှန်သောရတနာ ပစ္စည်းများကိုသာ ဈေးနှုန်းမှန်ကန်စွာ ရောင်းချပေးလျက်ရှိပါသည်။ ပြတိုက်အဆောက်အဦ၏ ရှေ့ညာဘက်တွင် (၃၃)တန်အလေးချိန်ရှိ ကျောက်စိမ်းရိုင်းတုံးကြီးကို အဖိုးတန်ကျောက်စိမ်းထွက်ရှိရာ မြန်မာနိုင်ငံ၏အထိမ်းအမှတ် အဖြစ် ပြသထားပါသည်။

၄။      မြန်မာ့ကျောက်မျက်ရတနာပြတိုက်(ရန်ကုန်)ကို တနင်္လာနေ့နှင့် နေ့ထူးနေ့မြတ်ရုံးပိတ်ရက်များမှအပ ကျန်ရက် များအားလုံးတွင် နံနက်(၀၉:၃၀)နာရီချိန်မှ ညနေ(၁၆:၀၀)နာရီချိန်ထိ ပြည်တွင်း/ပြည်ပဧည့်သည်များ ဝင်ရောက် လေ့လာကြည့်ရှုနိုင်ရန် ဖွင့်လှစ်ပေးလျက်ရှိပါသည်။ ပြတိုက်သတ်မှတ်ဝင်ကြေးအနေဖြင့် နိုင်ငံခြားသားတစ်ဦးလျှင် အမေရိကန်ဒေါ်လာ(၅)ဒေါ်လာနှင့်ညီမျှသော မြန်မာကျပ်ငွေ (နေ့စဉ်ငွေလဲလှယ်နှုန်းထားအတိုင်း)၊ မြန်မာနိုင်ငံသား လူကြီးတစ်ဦးလျှင်(၁၀၀၀)ကျပ်နှင့် ကလေးတစ်ဦးလျှင် (၅၀၀)ကျပ် သတ်မှတ်ထားရှိပါသည်။

Loading